痴呆孖寶

那天看立法會論壇,我看到了可能是人類史上最低能的競選表演:

新界東的何民傑,主打反加煙稅,本來反煙稅也沒什麼問題,但這個身光頸靚的何民傑竟然一邊講,竟然在後面配上兩條蛋散公然點煙,還要故作招積作地痞街童吞吐之狀,嘩,那一刻,我真是懷疑這個何民傑腦殘到了怎樣令人吃驚的的程度。

老老實實,你就算是煙民,只要你有點教養有點腦袋,也不會希望看到被PORTRAY成這些流氓狀吧?好了,就算你是流氓好了,何民傑擺明就是為了討你歡心,那你會投給這位執到好似去見英女皇一樣的醒目仔呢還是投給煙民革命家長毛呢?

更妙的還在後頭,孫柏文大發謬論之餘,竟然不自覺地篤爆了何民傑的低能的又一新境界,原來連反煙稅這樣的議題也是孫柏文提供的,連孫柏文都信,這個何民傑的智商也就可想而知了。不過在電視點煙扮地痞這種低能技倒應該是何民傑自家的主意,所以他應該比孫柏文更加恐怖一點。然而,孫柏文又很BUY這低絕人寰的把戲喎,所以,唉,他們痴痴呆呆坐埋一枱,真是龍兄虎弟天生一對呢!

今個禮拜日就係立法會選舉,孫柏文就一路都未講過今次選舉。今日,就一定要講,因為發生咗一件事,令我對有線寬頻(1097),甚至成個傳媒板塊非常擔心。
幾個月前,我識咗好耐,現係新界東候選人嘅何民傑話有意出選,問我應該打乜議題。咁我就好簡單同佢講:「我睇你做咁多嘢中,最有共鳴就係你反煙稅同反現有低能、迫曬啲煙民出行人路攻其他人嘅禁煙條例。你自己諗諗啦。」
反煙稅?就算充斥住社會主義候選人,我都真係唔信會有人夠膽反煙稅,因為反禁煙已成為政治上非常不正確的信念,冇人會提人類歷史中第一個全面禁煙國家——法西斯希特拉嘅納粹德國。
點知喺上個禮拜,有線電視搞嘅新界東立法會選舉論壇,何民傑一路話如果加煙稅就反對任期內餘下所有政府法案,後面嘅助選團隊就點煙抽番口!最正係原本個鏡頭只係影住何民傑,點知點煙後,個cam man一定係知呢個visual太震撼,所以即刻拉闊鏡影。
選立法會代表嘅辯論中,可以身體力行,用行為去解釋歧視煙民嘅法例,應該係民主、自由、開放嘅社會應做嘅事。做完,傳媒亦應有自由畀市民知立法會候選人表達過啲乜,所以我就好興奮叫曬我啲fellow煙民睇有線重播。
點知,有線新聞玩自我審查,喺再播時冇咗個風煙四起嘅鏡頭,向控煙辦低頭。
傳媒恐溫水煮蛙?
一向以來,我對有線新聞維護香港言論自由有絕對信心,對曾經喺嗰度講嘢為榮。有線新聞就係有線寬頻嘅crown jewel,當連佢哋都要喺民主概念中最核心嘅候選人辯論裡,因法例箝制言論自由,我哋香港變成咗啲乜?其他一路身體力行撐言論自由嘅傳媒機構,仲唔會遲早溫水煮蛙咁玩完?
煙,係咪政治不正確?係。不過,煙民已成社會總體自由之戰嘅前線,各位煙民,是時候團結反攻了!
孫柏文

Advertisements